Ĉu distance?
Oktobro 1, 2008
Homoj en la nuntempa mondo, ekzemple parolantoj de Esperanto, foje miras pri la koncepto “distanco” kaj kun bedaŭro diras ke “ni, kvankam tiom bonaj amikoj, pro la distanco tiom malofte renkontiĝas. Kaj kiel feliĉe, do, ke ekzistas modernaj komunikiloj”. Pere de ili la distancon eblas preskaŭ ignori.
Antaŭ mallonge mi renkontis konaton de antaŭ longe, fakte najbaron dum kelkaj jaroj antaŭ preskaŭ dudek jaroj. Estas certe dek kvin jaroj de nia pasinta renkontiĝo, tamen, aŭ ĝuste tial, la hazarda revido estigis reciprokan ĝojon. Mi devis rapide fosi en mia memoro: la nomojn de liaj infanoj, la okupiĝon de la edzino, la cirkonstancojn rilate ilian translokiĝon. Montriĝis ke ni daŭre loĝas en la sama urbo, sed en malsamaj partoj.
La biblioteko en kiu mi jam du kaj duonan jarojn laboras estas la plej granda publika biblioteko de suda Svedio. Pro tio mi ne ĉiun breton konas. Pasintsemajne mi devis serĉi libron en nekonata sekcio kaj trovis angulon, antaŭe ne viditan de mi, kaj surprizita mi spektis la bibliotekon el nova perspektivo. Kaj eksentis ke la koncepto “distanco” estas tre relativa.
Oktobro 2, 2008 at 11:13 atm
Jes, trovi sin en nekonata angulo de granda domo estis granda mistera plezuro de la infanaĝo, ĉu ne? Aparte plezurdona se temas pri angulo kiun tute ne scias la plenkreskuloj….
Oktobro 2, 2008 at 3:57 ptm
kion oni plej facile ne vidas, estas kiom plej proksima estas….
Oktobro 7, 2008 at 4:34 atm
Heinz Kahlau: Distancoj
La mezdistanca flugo
dauxras du horojn
gxis Beogrado.
Mi bezonis dek kvin jarojn.
Mia telefono kontaktigas min
en dek sekundoj
kun mia kolego -
sed de kvin jaroj jam
ni havas nenion
por diri al ni.
La distancoj farigxis
pli kurtaj kaj pli doloraj.
Oktobro 7, 2008 at 11:24 atm
Dankon, István, pro tiu trafa poemo. Mi povus ĝin verki mem…
Novembro 4, 2008 at 9:28 atm
Ĝuste! Distanco kaj renkontoj ne normas proksimecon – sole sentoj estas gravaj.
Novembro 15, 2008 at 11:31 atm
Distanco ne nur estas geografia afero
Dankon pro tiu bela blogero.